Իրանը «երբեք չի հանձնվի» ԱՄՆ-ին, այսօր հայտարարել է Իսլամական Հանրապետության գերագույն առաջնորդն օրեր շարունակված լռությունից հետո։
Իրանի պետական հեռուստատեսությամբ հեռարձակված տեսանյութում, որը նրա առաջին ելույթն էր հունիսի 19-ից ի վեր, այաթոլլա Ալի Խամենեին պնդել է, թե ԱՄՆ-ն միջամտել է պատերազմին միայն այն պատճառով, որ «զգացել է՝ հակառակ դեպքում սիոնիստական ռեժիմը լիովին կոչնչացվի»։
ԱՄՆ-ն «ոչ մի օգուտ չի ստացել այս պատերազմից», ասել է նա, հավելելով՝ Իրանը հաղթանակ տարավ և «ապտակ հասցրեց Ամերիկայի դեմքին»։
86-ամյա գերագույն հոգևոր առաջնորդն ակնհայտորեն նկատի է ունեցել այս շաբաթվա սկզբին Կատարում ամերիկյան բազայի հրթիռակոծությունը Իրանի կողմից, որի հետևանքով մարդկային զոհեր ու լուրջ ավերածություններ չեղան։
